Эрүүл мэндийн даатгалын ерөнхий газар 2022 онд хийж хэрэгжүүлсэн ажлаа дүгнэж, шинээр болон шинэчлэгдэн батлагдсан дүрэм, журам, аргачлалыг танилцуулах, нэгдсэн ойлголт өгөх, алба хаагчдад шаардлагатай мэдлэг чадварыг эзэмшүүлэх зорилгоор төвийн болон орон нутгийн нийт 200 гаруй албан хаагчдыг хамруулан хоёр өдрийн сургалт зохион байгууллаа.
Дэлхийн эрүүл мэндийн байгууллагын Монгол дахь суурин төлөөлөгчийн газартай хамтран зохион байгуулсан тус сургалтад Эрүүл мэндийн сайд С.Энхболд оролцож үг хэллээ. Тэрээр хэлсэн үгэндээ цар тахлын хүнд үед эрүүл мэндийн салбарын санхүүжилтийн шинэчлэлийг хийхэд ЭМДЕГ хамт олон мэргэжлийн ур чадвар гарган сайн ажилласныг сайшааж, ДЭМБ зүгээс манай улсын эрүүл мэндийн салбарын шинэчлэл ба эмийн хөнгөлөлт дээр баримталж буй бодлогууд үр дүн өгч дэвшил гаргаад байгааг саяхан манай улсад айлчилсан ДЭМБ эрүүл мэндийн салбарын санхүүжилт хариуцсан мэргэжлтнүүд онцолсныг дурьдаж баяр хүргэлээ.
Тэрбээр мөн "салбарын санхүүжилтийн шинэчлэл дуусах болоогүй бөгөөд таван жил хүртэл үргэлжилж байж бид зорьсон зорилтондоо хүрнэ" гэдгийг онцоллоо.
Мөн ЭМДЕГ дарга Л.Бямбасүрэн Эрүүл мэндийн салбарын санхүүжилтийн шинэчлэлийн хүрээнд гараад байгаа олон сайн дэвшлүүдийг илтгэлдээ танилцууллаа.
Сургалтаар ЭМДЕГ-ын төвийн болон орон нутгийн газар, хэлтэсүүд 2022 онд хийж гүйцэтгэсэн онцлох ажлаа танилцуулж, ЭМДҮЗ болоод ЭМДЕГ-ын шинээр болон шинэчлэн баталсан тогтоол, тушаал холбогдох дүрэм, журмыг хэрэгжүүлэхэд тулгарч буй ойлголтын зөрүүг арилгаж, нэгдсэн нэг ойлголтыг алба хаагчдад өглөө.
Мөн энэ үеэр газар, хэлтсүүд хамтран иргэн-даатгуулагч болоод эрүүл мэндийн байгууллагаас ирүүлсэн гомдол, мэдээллийг хэрхэн түргэн шуурхай шийдвэрлэж, төрийн үйлчилгээг хүндрэл чирэгдэлгүй үйчилгээ үзүүлэх практик хэрэгжүүлжсэн нь хамтын ажиллагаа, ялдаа холбоог бэхжүүлэх үр дүнтэй сургалт болсон юм.
Сургалтын төгсгөлд ЭМДЕГ 2022 онд хийж гүйцэтгэсэн ажил, арга хэмжээ, амжилт, ололтоо дүгнэн ирэх онд хэрэгжүүлэх ажлаа хэлэлцэж, ажил хөдөлмөрөөрөө хамт олноо хошуучлан ажилласан “Шилдэг албан хаагчид”, “Тэргүүний нэгж, хамт олон”-оо шалгаруулан шагнаж, урамшууллаа.
